युद्ध–कोरोनाविरुद्ध–३५ः पाँच प्रदेशका पाँच उपमेयर, दामासाही बजेट बण्डाले उपललब्धी न्यून

मेयर खबरदाता

पाँच प्रदेशका पाँच उपमेयरहरुले नगरपालिकाको बजेट वडा तहमा बराबर दामासाहीले भागबण्डा गरी विनियोजन गरिदिंदा लक्षित कार्यक्रम र वर्गसम्म बजेटको प्रभाव पुग्न नसकेको बताउनुभएको छ । मेयर खबरको समन्वयमा न्यूज २४ टेलिभिजनबाट प्रत्येक दिन प्रशारण हुँदै आएको ‘युद्ध– कोरोनाविरुद्ध’को आजको ३५ औं श्रृंखलामा बोल्दै उपमेयरहरुले यदि अबको बजेट पनि यसैगरी विनियोजन र खर्च गर्ने हो भने उपलब्धि न्यून हुनेतर्फ सजग गराउनुभएको हो । उहाँहरुले योजना तर्जुमा समितिको संयोजक आफैं रहे पनि योजना अनुरुप बजेट विनियोजन हुन नसकेकोमा दुखेसो समेत गर्नुभएको छ ।

रामेछाप नगरपालिकाकी उपमेयर सिर्जना खड्काले सुख्खाग्रस्त क्षेत्र भएकाले संघीय सरकारले पठाएको कार्यविधि अनुसार सबै नगरवासीलाई राहत वितरण गर्नुपर्ने देखिएको भन्दै नगरवासीलाई राहतको व्यवस्थापन चुनौपूर्ण रहेको बताउनुभएको छ । उहाँले स्रोतको उपलब्धता हेरेर क्रमशः लक्षित वर्गसम्म पुग्ने भन्दै जनताको चुल्होमा आगो बाल्न कुनै कसर बाँकी नराख्ने बताउनुभयो ।

बागमती नगरपालिकाकी उपमेयर लिला कुमारी मोक्तानले राहत दिनुपर्छ भनेर सोचिरहेको त्यही समुदायले उल्टै राहत संकलन गर्न सहयोग गरेकोमा बागमतीका जनतालाई धन्यवाद दिनुभएको छ । यसरी संकलित राहतले २२ हजार भन्दा बढीको चुल्हो बलेको उपमेयर मोक्तानले जानकारी दिनुभयो ।

धनकुटाकी उपमेयर शकुन्तला बस्नेतले जटिलताकाबीच पनि निरन्तरको हाम्रो संघर्ष जारी राखेकाले नगरवासी पनि सन्तुष्ट रहेको दावी गर्नुभयो । उहाँले नगरवासीको स्वास्थ्य र अधिकारमा कहिल्यै सम्झौता नगर्ने समेत बताउनुभयो ।

पोखरा महानगरपालिकाकी उपमेयर मञ्जुदेवी गुरुङले तालै तालको नगरको पोखराको मूल आयस्रोत नै पर्यटन भएकाले यतिबेला जटिल परिस्थिती सिर्जना भएको बताउनुभएको छ । पर्यटन क्षेत्रसँग निर्भर निम्न वर्गसम्म नगरपालिकाका पुगिसकेको पनि उपमेयर गुरुङले जानकारी दिनुभयो ।

वीरेन्द्रनगर नगरपालिकाकी उपमेयर मोहनमाया ढकाल यतिबेला दोहोरो जिम्मेवारी सम्हालीरहनुभएको छ । मेयर कोरोनाको कारण विदेशमा अड्किएकाले कार्यवाहक मेयरको पनि जिम्मेवारी सम्हालेकि उपमेयर मोहनमाया ढकालले भन्नुभयो, ‘चालु खर्चमा रहेका केही तालिम, गोष्ठी, भक्ता आदिका बजेट रकमान्तर गरेर भएपनि जनतालाई भोकै राखेका छैनौं र राख्दैनौं, तर अब राहतसँगै श्रमलाई जोडेर लैजाने तयारीमा छौं ।’

सबैजसो सहभागी उपमेयरहरुले आगामी बजेट कोरोना युद्ध लड्न सहज हुनेगरी आउनेमा ढुक्क रहन सबैलाई अनुरोध गर्नुभएको छ ।

आजको श्रृंखलामा प्रदेश १ बाट धनकुटा जिल्लाको धनकुटा नगरपालिकाकी उपमेयर शकुन्तला बस्नेत, प्रदेश २ बाट सर्लाही जिल्लाको बागमती नगरपालिकाकी उपमेयर लीला कुमारी मोक्तान, वागमती प्रदेशबाट रामेछाप जिल्लाको रामेछाप नगरपालिकाकी उपमेयर सृजना खड्का, गण्डकी प्रदेशबाट कास्की जिल्लाको पोखरा महानगरपालिकाकी उपमेयर मञ्जुदेवी गुरुङ् र कर्णाली प्रदेशबाट वीरन्द्रनगर नगरपालिकाकी उपमेयर मोहनमाया ढकाल सहभागी रहनुभएको सहजकर्ता शिव अधिकारीले जानकारी दिनुभयो ।

हरेक दिन न्यूज २४ टेलिभिजनबाट प्रशारण हुँदै आएको ‘युद्ध– कोरोनाविरुद्ध’को आजको ३५ औं श्रृंखलामा पनि आज शनिबार विहान ८ः३० र राती १० बजे प्रशारण हुने जनसम्पर्क अधिकृत प्रसन्न ढुंगानाले जानकारी दिनुभयो ।

Leave a Reply

Your email address will not be published. Required fields are marked *