खाँदबारी नगरको कोरोना कोषमा शिक्षकले गरे १० लाख ९१ हजार सहयोग

मेयर खबरदाता, संखुवासभा

५ असार । खाँदबारी नगरपालिकाको कोरोना राहत कोषमा शिक्षक महासंघ खाँदबारी कार्यसमितिले रकम सहयोग गरेको छ ।  कार्यसमितिले नगरको राहत कोषमा १० लाख ९१ हजार ७ सय ४२ रुपैयाँ सहयोग गरेको नगरपालिकाले जनाएको छ ।

महासंघ खाँदबारी कार्यसमितिले प्रावि तथा निमावि तहका शिक्षकहरुबाट ३ दिनको तलब र मावि तहको शिक्षकहरुको ५ दिनको तलब कोषमा जम्मा गरेको हो ।

सो रकम महासंघका अध्यक्ष तारा बहादुर बुढाथोकीले चेकमार्फत खाँदबारी नगरपालिकामा मेयर मुरारी प्रसाद खतिवडालाई हस्तान्तरण गर्नुभएको थियो ।

शिक्षकहरुले जम्मा गरेको रकम नगरले कोरोना रोकथाम तथा नियन्त्रणमा खर्च गर्ने मेयर  खतिवडाले मेयर खबरलाई जानकारी दिनुभयो ।

नगरपालिकाको राहत कोषका शुक्रवारसम्म ५६ लाख १८ हजार ९ सय ८० रुपैयाँसँगै खाद्य सामाग्री समेत जम्मा भएको छ ।