संक्रमित बढेसँगै आइसोलेसन कक्ष निर्माणमा जुट्यो धनगढी उपमहानगर

मेयर खबरदाता, कैलाली

५ असार । सुदूरपश्चिम प्रदेशमा कोरोना संक्रमित बढ्दै गएपछि सम्भावित जोखिमलाई ध्यानमा राखेर धनगढी उपमहानगरपालिका आइसोलेसन कक्ष निर्माण गर्ने काममा जुटेको छ ।  संक्रमितको उपचारका लागि उपमहानगरले २८ शैयाको आइसोलेसन कक्ष निर्माणको काम अन्तिम चरणमा पुर्याएको हो ।

वडा नम्वर १५ को जडीबुटी प्रशोधन केन्द्रका लागि निर्मित भवनमा आइसोलेसन कक्ष निर्माण भएपछि संक्रमितहरुलाई राखेर उपचार गर्न सहज हुने मेयर नृप बहादुर वडले मेयर खबरलाई जानकारी दिनुभयो ।

आइसोलेसन कक्षमा आवश्यक उपकरण जडान गर्ने काम धमाधम भईरहेको छ । धनगढी क्षेत्रमा कोरोना संक्रमित २५ जना फेला परेका छन् भने हाल ९ सय जना क्वारेन्टाइनमा बसिरहेका छन् ।

धनगढी उपमहानगरपालिकाले आइसोलेसन कक्ष आउँदो सोमबारबाट संचालनमा ल्याउने गरि काम अघि बढाएको छ । आइसोलेसन कक्षको क्षमता बढाएर सय बेड पुर्याउने उपमहानगरपालिकाले जनाएको छ ।